තහනම් වචනය : මාලිංග

දිනුවත් පැරදුණත් සැමදා එකට…

ක්‍රිකට් ක්‍රීඩකයින්ගේ කොන්ත්‍රාත්තු පිළිබඳ ප්‍රශ්න වරින් වර කරළියට එනවා. බටහිර ඉන්දීය දූපත් වල නිතරමත් ලංකාවේ නම් විටින් විටත් මේ ගැටළුව මතුපිටට එන්වා. නව තේරීම් කමිටු සභාපති සනත් ජයසූරියගේ මැදිහත්වීමෙන් මෙවර උද්ගත වූ ගැටළුව ඊයේ විසඳුණේ මාධ්‍යය වලට පුවත් මවමින්. ඇතැමෙකුගේ සිත් තුළ මේ සිද්ධිය නිසා ඇතිවුණේ ක්‍රීඩකයන් ගැන අප්‍රසාදයක්. කොහොම වුණත් වරින් වර මතුවණ මෙවැනි ගැටළුවලට හේතුව මීට වඩා ගැඹුරු එකක් බව තමයි මට නම් හිතෙන්නෙ.

වෘත්තිය ක්‍රිකට් ක්‍රිඩකයන් කියන්නෙ අද ඊයෙ ආපු පිරිසක් නෙවෙයිනෙ, ඒත් දැන් දැන් ක්‍රීඩකයන් රට වෙනුවෙන් ක්‍රීඩා කිරීමට වඩා මුදලට ප්‍රමුඛතාවය දෙන බව බොහෝ ක්‍රීඩා ලෝලීන් නගන මැසිවිල්ලක්. හොඳින් බැලූවිට පෙනෙන දෙයක් තමයි ගොඩක් වෙලාවට මේ ප්‍රශ්නය ඇතිවෙන්නෙ දේශීය තරගමාලාවන් එතරම් ඉහළ මට්ටමේ නොමැති රටවලයි. විශේෂයෙන් IPL වැනි 20-20 තරගාවලි නිසා ක්‍රිකට් ක්‍රීඩා කරන රටවල දේශීය තරගාවලි අතර අසමතුලිත බවක් ඇතිවෙලා.

පසුගිය දවස්වල ඇතිවෙච්ච සිද්ධි නිසා ක්‍රීඩකයන්ගේ විනය පිරිහිලා කියලත් ඇතැමුන් කිව්වා. ඒකෙත් ඇත්තක් ඇති. ඒ වුණාට ක්‍රීඩකයන් තුළ තියෙන රට ගැන හැඟීමේ අඩුවක් වෙලා තියෙනවනම් ඒකට වගකියන්න ඕනෙ අපේ දුර්වල මට්ටමේ දේශීය ක්‍රිකට් ව්‍යුහය (domestic structure) බවයි මට නම් හිතෙන්නෙ. මොකද ක්‍රීඩකයෙක් ගොඩනැගෙන්න අන්තර් සමාජ වගේ දේශීය ක්‍රිකට් තරගාවලි වලින් හොඳ සේවයක් වෙනවනම් ඒ ක්‍රිඩකයො අන්තර්ජාතික තළයට ගියාට පස්සෙත් හැකි සෑම වෙලාවෙම දේශීය තරගාවලි වල ක්‍රීඩා කරයි. ජාතික කණ්ඩායමේ ක්‍රීඩකයින් කීයෙන් කීදෙනාද දැන් කාලෙ එහෙම කරන්නෙ? ඉතින් දේශීය මට්ටමෙන් ක්‍රීඩකයාට ඒ දේ වෙන්නෙ නැත්නම් ක්‍රිඩකයින්ගෙ (විශේෂයෙන් වෘත්තීය මට්ටමේ) රට ගැන දේශීය ක්‍රිකට් ක්‍රීඩාව ගැන තියෙන ඇල්ම අඩුවෙන එක අහන්නත් දෙයක්ද?

ඉතින් ලංකාවෙ දේශීය ක්‍රිකට් දියුණු කරන්න තාම බැරි වුණේ ඇයි? ඒකට පළවෙනි හේතුව තමයි අපේ ක්‍රිකට් ව්‍යුහයේ තියෙන අඩුපාඩු. මූලික වශයෙන්ම ක්‍රීඩා සමාජ ක්‍රමය නිසා දුර බැහැර ක්‍රීඩකයින්ගේ අවස්ථා අවහිර වෙලා. ඒකට විසඳුමක් විදිහට අන්තර් සමාජ ක්‍රමය වෙනුවට අන්තර් පළාත් ක්‍රමයක් ඇති කරන්න යෝජනා වුණේ සෑහෙන කාලෙකට උඩදි. ඒත් ක්‍රීඩා සමාජ වල බලපෑම නිසා ක්‍රිකට් ආයතනය එහෙම කරන්න මැලි වුණා. ඒ නිසා ක්‍රීඩා සමාජ තියෙද්දිම අන්තර් පළාත් ක්‍රමයක් ඇතිකරන්න ඔවුන් කටයුතු කළා. මට හිතෙන විදිහට දේශීය ක්‍රිකට් නංවන්න තිබුණ සම්පත් විවිධ මට්ටමේ කණ්ඩායම් ගණනාවක් අතර බෙදිල ගිය නිසා මේකෙන් වුණේ ප්‍රශ්න වැඩි වීමක්. ක්‍රීඩා සමාජ අහෝසි කරන්න අදහසක් නැත්නම් හොඳම විසඳුම කොළඹින් බැහැර නගර දෙක තුනකත් ක්‍රීඩා සමාජ ඇති කරල දේශීය මට්ටමට වියදම් කෙරෙන සම්පත් මේ ක්‍රීඩා සමාජ දියුණු කරන්න යොදවන එක.

ඉතින් බලධාරීන් මේ ගැන පහැදිලි තීරණයක් ගන්න තුරු ලංකාවෙ දේශීය ක්‍රිකට් ක්‍රීඩාව එන්න එන්නම දුප්පත් වෙයි. ඊයෙ ඇතිවුණා වගේ ප්‍රශ්න දිගින් දිගටම ඇතිවෙයි. ක්‍රීඩා ලෝලීන් බැණ බැණ වුණත් දිගටම ක්‍රිකට් මැච් බලයි.

ශ්‍රී ලංකා ලෝක කුසලාන කණ්ඩායම කොහොම වෙයිද ?

අද ජනවාරි 5වැනිදා. ඒ කියන්නෙ තව දවස් 45කින් ලෝක කුසලානෙ ආරම්භ වෙනවා. මෙදා පාර ලෝක කුසලානය ශ්‍රී ලංකාවට දෙපැත්තකින් වැදගත් වෙනවා. එකක් අපි මේ පාර අවුරුදු 15කට පස්සේ සත්කාරකත්වය දරනවා. අනික හැමදාම වගේ මේ පාරත් අපි යන්නෙ දිනන්න බලාගෙන.

මේ ලිපියෙන් මම කතා කරන්නෙ කුසලානය දිනන්න අපේ කණ්ඩායමේ සූදානම ගැන. ICC එකේ අවශ්‍යතාවකට අනුව සති කීපයකට උඩදි 30 දෙනෙකුගෙන් සමන්විත සංචිතයක් නම් කළා. ලෝක කුසලානයකට කණ්ඩායමක් නම් කරන කොට බොහෝ විට ක්‍රීඩකයින්ගේ ODI අත්දැකීම් මත තමයි තේරීම සිදු වෙන්නෙ. මොකද ලංකාවෙ අන්තර් සමාජ මට්ටම සහ ODI අතර ලොකු වෙනසක් තියනවා. කොහොම වෙතත් මේ 30 දෙනා තෝරන එකනම් අරවින්ද ද සිල්වාට එච්චර අමාරු වෙන්න නැතුව ඇති. මේ සංචිතය බොහෝ දෙනාගේ කතාබහට ලක් වුණේ දිගින් දිගටම අසාර්ථක වුණු සනත් ජයසූරිය සහ සෑහෙන කාලයක් ජාත්‍යන්තර ක්‍රිකට් පිටියෙන් ඈත්වෙලා හිටපු චමින්ද වාස් කියන ජ්‍යෙෂ්ඨ ක්‍රීඩකයින් (මේ දෙන්නම අරවින්දත් මුරලිත් ඇතුලු 96 ජයග්‍රාහී කණ්ඩායමේ සාමාජිකයෝ) ඇතුළත් වුණ නිසා.

සංචිතය තේරුවට පස්සේ…..ඊට පස්සෙ ක්‍රිකට් ආයතනය වාර්ශික අන්තර් සමාජ ඕවර 50 තරගාවලිය (SPL) දෙසැම්බර් වල ආරම්භ කළා. මේක ඉතාම වැදගත්. මුලින් කිව්ව වගේ අන්තර් සමාජ මට්ටම සහ ODI අතර ලොකු වෙනසක් තිබුණත් සංචිතයෙ ඉන්න ක්‍රීඩකයන්ට අවසාන කණ්ඩායමේ (ජනවාරි 15වෙනිදා 15 දෙනෙකුගෙන් යුක්ත අවසන් කණ්ඩායම නමි කිරීමට නියමිතයි.) ස්ථාන තහවුරු කරගන්නත් සමාන තණතීරු වලට හුරුවෙන්නත් මේ තරගාවලිය උදව් වෙනවා. තරගාවලිය 9වෙනිදා අවසන් වෙනවා. මෙතෙක් පැවති තරග සටහන් ඇසුරෙන් මම මගේ කණ්ඩායම තෝරන්නයි යන්නේ….

1.ටී.එම්.දිල්ශාන්

වැඩිම ලකුණු ලැබූ පිතිකරුවන් අතර 2වැනි තැන තරග 5කදී ලකුණු 281 ( වැඩිම 133* , ශතක 2යි , සාමාන්‍යය 70.25 , ප්‍රහාරක වේගය 126.00 )

විශේෂ : ලකුණු 281න් 216ක්ම Boundaries වලින් , බදුරලිය කණ්ඩායමට එරෙහිව පන්දු 60කින් ශතකය

2.උපුල් තරංග

වැඩිම ලකුණු ලැබූ පිතිකරුවන් අතර 5වැනි තැන තරග 5කදී ලකුණු 223 ( වැඩිම 118* , ශතක 1යි , අර්ධ ශතක 1යි , සාමාන්‍යය 44.6 , ප්‍රහාරක වේගය 84.46 )

3.කුමාර් සංගක්කාර

වැඩිම ලකුණු ලැබූ පිතිකරුවන් අතර 7වැනි තැන තරග 5කදී ලකුණු 195 ( වැඩිම 133 , ශතක 1යි , සාමාන්‍යය 39.00 , ප්‍රහාරක වේගය 82.27 )

4.මහේල ජයවර්ධන

වැඩිම ලකුණු ලැබූ පිතිකරුවන් අතර 6වැනි තැන තරග 4කදී ලකුණු 212 ( වැඩිම 163* , ශතක 1යි , සාමාන්‍යය 70.66 , ප්‍රහාරක වේගය 107.07 )

විශේෂ : SSC පිළේ ආරම්භක පිතිකරු

5.චාමර කපුගෙදර

වැඩිම ලකුණු ලැබූ පිතිකරුවන් අතර 8වැනි තැන තරග 4කදී ලකුණු 194 ( වැඩිම 108 , ශතක 1යි , අර්ධ ශතක 1යි , සාමාන්‍යය 48.5 , ප්‍රහාරක වේගය 83.26 )

6.ඇන්ජලෝ මැතිව්ස්

පිතිකරුවෙක් ලෙස සාර්ථක වුණේ නැහැ. ( තරග 4 කදී ලකුණු 40යි. ) යවා ඇත්තේ ඕවර 9යි. හොදම 3/11 කෙසේ නමුත් ඇන්ජලෝගේ ODI අත්දැකීම් මත all rounder කෙනෙක් ලෙස ඇතුළත් විය යුතුයි.

7.තිසර පෙරේරා

තරග 4කදී ලකුණු 112 ( අර්ධ ශතක 1යි , සාමාන්‍යය 37.33 , ප්‍රහාරක වේගය 113.13 )

වැඩිම කඩුලු ලැබූ පන්දුයවන්නන් අතර 2වැනි තැන තරග 4කදී කඩුලු 10 ( සාමාන්‍යය 12.3 , ඕවරයට ලකුණු 4.73 )

8.චමින්ද වාස්

පසුගිය එංගලන්ත තරගවාරයේ වටිනාම ක්‍රීඩකයා බවටත් පත්වුණා. Colts පිළේ ආරම්භක පිතිකරුවා ලෙස එතරම්ම සාර්ථක වුණේ නැහැ. වැඩිම කඩුලු ලැබූ පන්දුයවන්නන් අතර 11වැනි තැන තරග 4කදී කඩුලු 7 ( ඕවරයට ලකුණු 3.26 )

9.ලසිත් මාලිංග

ක්‍රීඩා කළ තරග 2දී කඩුලු 4ක් දවා ගත්තා. කෙසේ නමුත් මාලිංගගේ ODI අත්දැකීම් මත අනිවාර්යෙන්ම ඇතුළත් විය යුතුයි.

10.සුරාජ් රන්දිව්

තරග 4කදී කඩුලු 6 ( ඕවරයට ලකුණු 5.71 ) නමුත් පසුගිය කාලයේ ODI තරගවල හොදින් ක්‍රීඩා කළා.

11.මුත්තයියා මුරලිදරන්

SPL ක්‍රීඩා කළේ නැහැ.

12.නුවන් කුලසේකර

තරග 3කදී කඩුලු 4 ( ඕවරයට ලකුණු 4.00 ) ODI Rankings වල මුල්පෙළේ සිටින එකම ශ්‍රී ලාංකික පන්දු යවන්නා අනිවාර්යෙන්ම ඇතුළත් විය යුතුයි.

13.තිලාන් සමරවීර

වැඩිම ලකුණු ලැබූ පිතිකරුවන් අතර 14වැනි තැන තරග 4කදී ලකුණු 175 ( වැඩිම 70 , අර්ධ ශතක 3යි , සාමාන්‍යය 87.5 , ප්‍රහාරක වේගය 85.36 )

14.දිල්හාර ප්‍රනාන්දු

තරග 3කදී කඩුලු 5 ( ඕවරයට ලකුණු 4.17 ) දිල්හාරගේ අත්දැකීම් සහ 140KpH වේගයෙන් පන්දු යැවිය හැකි වීම නිසා

15.අජන්ත මෙන්ඩිස්

SPL Tier B එකේ පහසුවෙන්ම හොදම පන්දු යවන්නායි. (SL Army කණ්ඩායම) තරග 4කදී කඩුලු 16 ( සාමාන්‍යය 7.62 , ඕවරයට ලකුණු 3.53 හොදම 6/12 ) ඇතැම් කණ්ඩායම්වලට එරෙහිව තුරුම්පුවක් ලෙස භාවිත කළ හැකි විශේෂ පන්දු යවන්නෙකි.

ඕක තමයි මගේ තේරීම. 30 දෙනාගෙ සංචිතයෙන් ගොඩක් අය බලාපොරොත්තු තියාගෙන හිටිය සනත් සහ චන්දිමාල් අසාර්ථක වීම කැපී පේනවා.කොහොම වෙතත් චාමර සිල්වා ( ලකුණු 192 , සාමාන්‍යය 64.00 , ප්‍රහාරක වේගය 92.3 ) , වෙලගෙදර , ජීවන් මෙන්ඩිස් , රංගන හේරත් සහ මහරුෆ් කියන ක්‍රීඩකයින්ටත් අවස්ථාවක් තියනවා.

තවත් දෙයක්…SPL වැඩිම ලකුණු ලැබූ පිතිකරුවන් අතර 1,3,4 ස්ථාන ලබා සිටින මහේල උඩවත්ත, මලින්ද සිරිවර්ධන හා මුබාරක් 30දෙනාගේ සංචිතයේ නොසිටීමත් විශේෂයි.

පස්සෙ හම්බෙමු.